Ávaxtakarfan

Pinotage

2009-02-08T19:52:00.007-06:00

Pinotage is a varietal native to S-Africa that was the product of crossing Pinot Noir with Cinsault (spelled Cinsaut by the locals). We tried two bottles tonight, both available from Trader Joe's.

Bon Cape Pinotage 2006 is made from grapes grown organically in the Robertson region, an outstanding wine region about 100km east of Cape Town. The wine exhibits an earthiness characteristic of the grape. It is fruit forward with an abundance of strawberries and cherries and is rounded out with supple tannins. As a whole it makes a succulent little wine while reminiscent of some of the more popular wines of the Willamette valley. I did not notice the notorious band aid on the nose. I give this wine which costs $11.99 at my local TJs 86 points.

Zarafa Pinotage 2008 is a substantially simpler wine. It lacks the balance of its rival from Bon Cape, tasting slightly too alcoholic. There is a noticable off-taste, which might be what some describe as band-aid. I would recommend all but those on the tightest budget to look further afield. The wine was $3.99 at TJs and is gets 71 points.

Bragðæfingar

2008-03-02T16:12:00.004-06:00

Héldum áfram með bragðæfingar í dag. Tvær æfingar voru á dagskrá:

1) Kynnast helstu sýrum sem fyrirfinnast í víni, sem eru:
Vínsýra
Eplasýra
Sítrónusýra
Mjólkursýra
Kolsýra
Ediksýra

Ekki mjög vísindalegt, en það tók mig svolitla stund að finna vínstein til að búa til vínsýruna.

2) Önnur bragðæfing gekk út á að finna skynmörk okkar Tinnu á sykurlausn. Það gekk þannig fyrir sig að ég bjó til sykurlausnir með stigvaxandi styrk. Notað var kalt síað Chicago kranavatn. Byrjaði í um það bil 20g/l og helmingaði í hverju skrefi. Hætti að geta greint sykurinn í um það bil 1.5g/l eða 1/4 teskeið blandað í 8 dl af vatni. Prófunin fór að sjálfsögðu fram blint eins og sést á myndinni hér til vinstri.

Konudagskvöld

2008-02-24T23:45:00.004-06:00

Eins og þið vitið öll þá tökum við Tinna konudaginn gríðarlega alvarlega. Því var ekki annað í spilinu fyrir mig en að standa mig í stykkinu á konudagskvöld.

Matseðill
Mexíkanskt-spánskt tapas fusion með glóðarsteiktum mildum chile pipar, tómötum og hvítlauk
Léttur grænkáls og hvítbaunaréttur að hætti Lorentz frá Alsace
Glaðningur úr eldhúsinu
Bláberjabaka

Vínseðillinn var samanburðarsmökkun á tveimur Gewürztraminer vínum frá Alsace.

Ostabakkinn stóð reiðubúinn en hans gerðist víst ekki þörf.

Atburðurinn var myndaður til gamans. Það kom í ljós að þessi mildi chile pipar var ekki til á wikipedia en úr því var bætt.

Bragðæfingar

2008-02-20T11:25:00.000-06:00

Hluti af vín- og matarpælingum okkar þessa dagana er að gera bragðæfingar, sérstaklega þær sem ganga út á blindsmökkun.

Fyrsta æfingin var smökkun án þess að nota lyktarskyn. Ég raspaði epli, kartöflu, gulrót og blaðselju. Síðan var bundið fyrir augun á Tinnu og hún hélt fyrir nefið og reyndi að átta sig á hvað ég var að mata hana með hverju sinni.

Það er ekki að því að spyrja að þegar kom að mér þá byrjaði Tinna að stríða mér með því að blanda saman mismunandi tegundum. Mjög sniðugt.

Mistök við víngerð

2008-02-15T22:58:00.001-06:00

Þessi ágæti maður á myndinni hér til hægri er greifi í Chianti Classico héraðinu sem ég hitti áðan í vínsmökkun. Mjög viðkunnanlegur náungi og fróður um víngerð, enda sér hann um hana sjálfur. Vínin sem hann leyfði okkur að smakka voru úr mjög óvenjulegum þrúgum, sérstaklega fyrir Chianti Classico héraðið, þar sem aðallega er að finna Sangiovese, Cabernet Sauvignon, Trebbiano, Calvaioso og Malvasia. Vín greifans voru reyndar að miklu leyti úr Sangiovese (sem betur fer) en síðan voru ýmsar skrýtnar þrúgur með í spilinu. Ástæðan var skemmtileg fyrir okkur en varla fyrir greifann. Árið 1967 ákvað fjölskyldan að gróðursetja mikið af nýjum plöntum. Þeir vissu að sjálfsögðu hvaða þrúgutegundir þeir vildu og fóru til Pisa til að kaupa þrúgurnar. Miklu seinna kom í ljós að vínviðurinn sem þeir keyptu var samansafn af ýmsum tegundum öðrum en þeim sem þeir vildu. Það sem hafði gerst var 1967 voru mikil flóð í Pisa og þá flutu merkimiðarnir meira og minna frá vínviðnum sem notaður var til að selja af. Svo virðist sem sölumennirnir hafi einfaldlega giskað á hvað var hvað með ekki betri árangri en svo.

Hann sagði mér frá félaga sínum sem keypti sér einnig það sem hann hélt að væri Sangiovese á sama tíma. Síðan liðu áratugir og manninum ætlaði aldrei að takast að ná almennilega kraftmiklu víni úr þrúgunum. Kemur í ljós að hann er búinn að vera að rækta Pinot Noir allan þennan tíma. Ekkert mál hugsar kallinn, selur það einfaldlega fyrir það sem það er og fær núna gríðarhá verð fyrir vínin sín, enda sérlega fágætt að fá Pinot Noir frá Chianti Classico.

Mendoza

2008-02-09T23:50:00.000-06:00

Áhugi á víni er að fara vaxandi þessa stundina en hefur þó verið nógur fyrir.

Áttaði mig á því áðan að vínið sem við drukkum í kvöld í hópi félaga er næstum því frá sama stað í Argentínu og vín sem við drukkum fyrir nokkrum dögum hér heima hjónin. Um er að ræða Mendoza hérað í Argentínu, sem er beint vestan af Buenos Aires í u.þ.b. 1000m hæð í hlíðum Andes fjallagarðsins. Argentína framleiðir gríðarlegt magn af víni. Það er í fimmta sæti á alþjóðavísu í framleiðslumagni og fremst meðal suðurameríkuþjóða, framar Chile. Mendoza er aðalhéraðið og heitir eftir samnefndri borg í miðju héraðinu. Bestu aðstæður til víngerðar eru í mikilli hæð vegna mikils sumarhita. Það getur hinsvegar verið varasamt því fyrsta frostið getur borið að snemma. Auk þess kemur fyrir að mikil haglél skemmi alla uppskeruna.

Frægasta þrúgan í Mendoza er Malbec, sem var flutt inn frá Bordeaux á 19. öldinni. Á þeim tíma var Malbec algengasta þrúgan í Bordeaux en nú hefur Cabernet Sauvignon tekið við eins og frægt er. Malbec þrúgan er reyndar ekki svo ósvipuð Cabernet Sauvignon, svipuð dökk berjabrögð sem minna á sólber, brómber, kirsuber, tóbak og leður.

Vínin sem um ræðir voru annarsvegar frá Kaiken víngarðinum en hinsvegar Alamos merki Catena fjölskyldunnar. Báðir garðarnir eru innan við 10km sunnan við borgina Lujan de Cuja, skammt sunnan Mendoza borgar. Bæði voru mikil vín með óvenjuháum áfengisstyrk, annars vegar 13% en hinsvegar 14,5%. Mjög sterk berjabrögð og djúpir leðurtónar. Ágæt vín í spjall með góðum vinum.

Af dvölinni

2007-07-07T08:32:00.001-05:00

Góðir hálsar,

Í vikunni sem leið voru tveir frídagar --- þjóðhátíðardagurinn fjórði júlí og síðan Community Teamworks. Síðarnefndi atburðurinn er hluti af góðgerðastarfsemi Goldman Sachs. Þá fær maður frí í vinnunni og fer í staðinn að sinna góðgerðamálum. Við framhaldsnemarnir í sumarstörfum (s.k. summer associates) fengum að fara í byggingarvinnu --- byggja hús handa fólki með takmörkuð fjárráð.

Það var ansi gaman að vinnunni en sennilega enn áhugaverðara að uppgötva hverskonar samansafn af fólki er þarna á ferðinni. Ég sagði einhverjum frá því að ég hefði unnið svolitla málningarvinnu í fyrra. Sú rak nú upp stór augu og sagði "I have so much respect for that kind of work now that I have seen what it is like." Ég er nú ekki sérstaklega vanur því að vera handlagnasti maðurinn í hópi en þarna var það uppi á teningnum. Frekar skondið alltsaman.

Við erum með mikla dagskrá hérna næstu vikurnar. Ég fæ ekki betur séð en flestar vinkonur Tinnu ætli að koma hingað í heimsókn. Síðan ætlar hann Gummi að kíkja til okkar í lok Ágúst en einnig mæður okkar og systur fjórar saman í mæðginaferð. Gaman að því og verið öll velkomin.

2007-07-01T20:22:00.000-05:00

Við erum búin að vera í New York í á fjórðu viku og tíminn líður ansi hratt. Mjög spennandi í vinnunni hjá mér og síðan gott að slappa af um helgar í hlaða batteríin. Um þessa helgina var þemað sjávarréttir, eins og sést á kræklingamyndinni hér til hliðar. Fórum líka á the Met, sem er listasafnið hér um slóðir, í gær. Þar sáum við m.a. Dendur-hofið sem var flutt til NY frá Eygptalandi í heilu lagi fyrir um 30 árum síðan.

New York

2007-06-09T19:50:00.000-05:00

Við erum komin til New York. Gistum fyrstu dagana rétt hjá byggingu SÞ hjá ágætum Belga sem er í leyniþjónustu SÞ. Ekki vissi ég að það væri til ! Hann er búinn að fræða okkur um eðli hryðjuverkastarfsemi í Lebanon jafnt sem annars staðar.

Milli þess sem við erum að leita að íbúð til lengri tíma þá má náttúrulega ekki gleyma því að kíkja af og til út að borða. Í kvöld fórum við á klassískan deli hér í hverfinu sem heitir Sarge´s deli. Fengum sitthvora pastrami samlokuna sem er í grundvallaratriðum hjartaáfall með sinnepi. Sjá myndir.

Setti nokkra staði á kort sem stefnt er að að prófa.

Sjávarfang

2007-06-03T15:34:00.000-05:00

Ég er um þessar mundir gripinn mikilli hrifningu af allskyns sjávarfangi. Höfum gert mikið af því að borða fisk undanfarnar vikur en auk þess keypti ég mér í síðustu viku lifandi krabba sem ég og sauð. Bjó líka til gómsætt fiskisoð.

Stærri krabbinn að berjast fyrir lífi sínu:

Nokkru síðar:

Svona á að gera fiskisoð:

Fleiri myndir.

Andsvar við Bernanke

2007-05-18T10:40:00.000-05:00

Seðlabankastjórinn Bernanke hélt ræðu í Chicago í gær um ástandið á húsnæðislánamarkarðnum (subprime mortgage). Þessi markaður var mjög heitur fyrir eins og tveimur árum síðan, þegar fólk var æst í að taka þátt í fasteignamarkaðnum og var til í að borga okurvexti af háum lánum þrátt fyrir lágar tekjur og litlar eignir. Í dag eru bankarnir að súpa seyðið af þessum útlánum því töluvert er um að þetta fólk sé að fara á hausinn.

Ég hef mikinn áhuga á gangi þessara mála, ekki síst þar sem mér bauðst s.l. jól að vinna í sumar í mortgage modeling hóp í stórum banka í New York. Þetta er hópur sem hefur gert mjög góða hluti í nokkur ár en ég ákvað að sleppa þessu þar sem mortgage markaðurinn hefur greinilega toppað í bili. Vinnan á þessu sviði er mjög tölfræðileg, en hún gengur að miklu leyti út á að meta líkur á því að skuldunauturinn greiði upp lánið og taki annað á betri kjörum.

Ástæðan fyrir því að þessi færsla er skrifuð er hinsvegar hnittið andsvar þingmannsins Chuck Schumer við ræðu Bernanke: "I hope that Chairman Bernanke is right when he says that a slumping housing market will not affect the broader economy, but I would not bet the house on it."

Lasse Gjertsen

2007-04-15T22:32:00.000-05:00

Liðið aðeins og langt frá síðustu færslu.

Hef frá mörgu að segja en fyrst þetta:

Lasse Gjertsen - Amateur

Þvílíkur snillingur þessi krakki.

Vel giftur

2007-03-02T16:12:00.000-06:00

Það er sko munur að vera vel giftur þegar maður stendur höllum fæti.

Tinna ákvað að vinna heima í dag og halda mér félagsskap. Það er enginn greiði of stór til að hún afgreiði hann ekki um hæl né heldur of lítill til að hún bjóðist ekki til þess af fyrra bragði.

Meiri skilningur hjá henni en hjá þessum Wall Street gæjum sem ég þarf að fresta viðtölunum með, það get ég sagt ykkur.

Flensa dauðans

2007-03-01T21:02:00.000-06:00

Ég sit heima með flensu. Það er ekkert frábærlega skemmtilegt. Það var einmitt leiðbeinandinn minn sem smitaði mig af þessari flensu en ég get sjálfum mér um kennt fyrir að vilja endilega hitta hann þó hann hafi ennþá verið svolítið slappu.

Það jákvæða við flensuna er að á sama degi sá ég nýja þjónustu hjá Netflix, núna get ég horft á 18 klst af myndefni beint af tölvunni í hverjum mánuði. Þetta er s.k. streaming tækni. Það er greinilegt að framtíðin er núna hjá Netflix ! Ég horfði því á Hitchcock myndina North by Northwest og síðan breska þætti, bæði Yes Prime Minister og Ripping Yams. Eins og þið hafið kannski áttað ykkur á er lítið um nýjustu myndirnar þarna en ágætis tækifæri til að kíkja á klassískar myndir sem mann hefur langað að sjá.

Einn aðalgallinn við þessu flensu er að ég er búinn að skipuleggja samtöl við allskonar fólk á Wall Street sem hefur áhuga á að ráða mig í sumar. Ég þarf semsagt að velja hvert ég ætla að fara og geri það með því að tala við fólkið í símann. Treysti mér engan vegin til þess núna --- vona að þeir taki það ekki sem merki um áhugaleysi.

The Graduate

2007-02-19T00:51:00.000-06:00

Snilldar mynd sem við hjónin vorum að horfa á frá 1967. Aðalleikarinn er Dustin Hoffman. Þetta er gamanmynd og húmorinn er svolítið í ætt við myndir með Jacques Tati og Peter Sellers. Hún er ekki beint sprenghlægileg, húmorinn felst aðallega í því að aðalpersónan lendir í óþægilegum aðstæðum sem hún á erfitt með að fást við. Frá þessu tímabili mæli ég einnig með The Party (1968) og Les Vacances de Monsieur Hulot(1953).

Talandi um kvikmyndir þá sáum við einnig Children of Men um helgina. Hreint ótrúlega vel gerð mynd sem blandar saman ótal þætti og stendur vel í sérhverjum þeirra.

Annað sem ég hef verið að horfa á nýlega eru þættirnir "The Wire" á HBO. Þetta eru þættir um löggur og bófa í Baltimore. Ég hef ekki mikla reynslu af lögguþáttum en þessir eru listilega vel skrifaðir. Þeir hafa unnið rannsóknavinnuna vel, höfundarnir, því lýsingarnar á götulífinu og pólítíkinni bæði hjá borginni og hjá glæpagengjunum eru mjög trúverðugar. Í fjórðu seríu þáttanna breytir aðalhetjan um starf og verður grunnskólakennari í fátæku hverfi. Ég er ekki kominn svo langt enn en mér skylst að hann komist að því að kennarastarfið sé síst auðveldara og langt í frá hættuminna en löggustarfið.

Það er raunar það sama og lögga sagði mér sem stoppaði mig fyrir of hraðan akstur um árið. Hann reyndi að vera grunnskólakennari en það var of hættulegt. Þannig að hann fór í lögguna.

Enn um skemmdan mat og aðra ólyfjan

2007-02-12T14:27:00.000-06:00

Ég ætla sjálfur að svara síðustu færslu enda kemur í ljós að ýmiss fróðleikur er á netinu.

Tvö góð svör er að finna á vísindavefnum. Annars vegar um kæsingu en hinsvegar um hversvegna hákarl er ekki étinn ferskur. Sjá einnig hér.

Ég vísaði áður til greinar um efnagreiningu á kæstum hákarli.

Séríslenskt

2007-02-11T14:09:00.000-06:00

Undanfarin tvö kvöld höfum við hingað fengið gesti í mat. Þeim bauð ég meðal annars hákarl og brennivín. Kári, sem kom í heimsókn á föstudaginn með tilvonandi eiginkonu sinni, benti mér á að svarti dauði er ekki sami óþverri og brennivín. Þetta eru semsagt tveir ólíkir óþverrar: svarti dauði er semsagt vodki en brennivín er eins og við vitum öll nokkurskonar landi með léttum kúmenkeim. Þetta vissi ég semsagt ekki fyrir.

Varðandi hákarlinn þá hef ég verið að velta því fyrir mér í mörg ár nákvæmlega hvernig hákarl er verkaður. Það þekkja allir sögurnar um hákarl sem er grafinn í fjöru og jafnvel migið á. Eitthvað segir mér að menn hafi minna fyrir framleiðslunni á 21. öldinni. Það er fullkomlega ómögulegt að verða sér úti um góðar upplýsingar um hákarlsverkunaraðferðir á netinu. Fyrir nokkrum árum þegar ég var að leita að upplýsingum þá fann ég grein eftir prófessor í efnafræði við HÍ sem hafði efnagreint hákarl. Mig minnir að hann hafi komist að því að þar væri að finna ýmis vafasöm efni en flest undir hættumörkum. Það var hinsvegar ekki mikil umfjöllun þar heldur um raunverulegar verkunaraðferðir.

Nú skora ég á þig, lesandi góður, að fræða okkur hin um það hvernig þessa kræsingar verða í raun og veru til.

Blogg kapp

2007-02-07T00:08:00.000-06:00

Þetta blogg er eiginlega um ekki neitt.

Konan mín, hún Tinna, er að blogga rétt í þessu og ég ákvað að blogga líka henni til samlætis.

Ég kláraði um daginn bókina Rokland eftir Hallgrím Helgason. Hún er ansi skemmtileg. Áður en ég náði að klára hana stal fyrrtéð Tinna henni af mér og kláraði áður en ég fékk nokkru um það ráðið. Ég fór því í fýlu og kláraði hana ekki fyrr en núna.

Aðrar bækur sem ég er að lesa þessa stundina eru eftirtaldar; Against the Gods: The Remarkable Story of Risk (P Bernstein), Das Urteil (Franz Kafa), Die Erzaehlungen (Thomas Mann), How to Climb 5.12 (E Horst) og L´Etranger (Albert Camus). Ég get mælt með þeim öllum. Það segir þó sitt að ég kláraði Rokland á undan öllum hinum.

Frost og sprikl

2007-02-05T12:15:00.000-06:00

Þessa dagana er fáránlega kalt í Chicago. Það er búið að vera í kringum 20 gráðu frost í nokkra daga. Ef vindurinn er tekinn með í reikninginn, s.k. "windchill factor", þá er líðanin eins og í 30 gráðu frosti. Æði kalt.

Í þessum kulda er ég farinn að taka þátt í íþrótt sem heitir Broomball. Spilað er á skautasvelli en engir eru skautarnir, maður mætir bara í strigaskóm. Síðan er þetta nokkurskonar hokkí, maður er með kylfur og stóran hjálm og reynir að koma boltanum í lítið mark. Þetta er ansi skemmtilegt og nú hefur liðið okkar, sem heitir "Polar coordinates", unnið þrjá leiki í röð og komist áfram í næsta riðil (?). Þetta er náttúrulega tilvalið sport í 20 gráða frosti. Tinna tók þátt í fyrstu tveimur leikjunum en þá var brotið illa á henni og hún lenti á svellinu eftir tvöfalda skrúfu í loftinu.

Tinnu finnst þetta þó greinilega ekki næg hreyfing af minni hálfu því nú gaf hún mér bók í síðbúna afmælisgjöf sem heitir "How to climb 5.12". 5.12 er semsagt erfiðleikagráðan en eins og er rembist ég við að klifra 5.9 og hef kannski getad eina 5.10. Þessi skali er nokkurskonar richter skali þannig að ég get klifrað svona skjálfta á við þungan mann á gangi er bókin fjallar um að framreiða Suðurlandsskjálfta. Gangi mér vel.

Plön

2007-02-01T17:30:00.000-06:00

Kæri lesandi

Ef þú ert ennþá að lesa þetta blogg, þótt liðið sé á þriðja mánuð frá síðustu færslu, þá ert þú hetja mikil.

Ég hugsa að ég láti duga fyrir þessa færslu að segja ykkur frá plönum okkar hjóna í næstu framtíð.

Í Spring break, sem er um miðjan mars, ætla ég að koma heim til Íslands. Ég verð í akkorðsvinnu að vinna að stuttu verkefni sem mér finnst nógu áhugavert til að taka smá frí frá doktorsvinnunni til að spá í. Hún Tinna ætlar ekki að húka heima í kotinu á meðan heldur ætlar hún til Bermúda í skólaferð.

Um sumarið stefnir í að ég verði í vinnu hjá fjárfestingabanka í New York. Tinna stefnir á að koma með og vinna í rannsóknunum sínum. Við stefnum á að búa á Manhattan. Ef þú veist um íbúð þar til leigu þá hef ég mikinn áhuga. Gestir eru sennilega velkomnir.

Lengra í framtíðina þori ég ekki að skyggnast með ykkur rétt eins og stendur.

Rettritun.is

2006-11-16T12:47:00.000-06:00

Ég hef stundum verið staðinn að því að gera létt grín að félögum mínum þegar ég verð var við stafsetningarvillur í skrifuðu máli þeirra. Þess vegna hlakkaði ég til að spreyta mig á nýju réttritunarsíðunni, rettritun.is.

Það er skemmst frá því að segja að síðan benti mér snarlega á að kynna mér betur kafla tvö í reglum um réttritun. Skemmtilegt flashback í 8. bekk. Ekki hefði maður trúað því þá að á 28. aldursári myndi maður viljandi gangast undir upplestraræfingu.

Poker

2006-10-22T12:32:00.001-05:00

Það er póker æði í Bandaríkjunum. Nánar tiltekið Texas Hold´em æði sem hefur verið í gangi í nokkur ár. Vinsældirnar eru drifnar áfram af sjónvarpsefni um póker, þar sem sýnt er frá keppnum. Þá eru bæði heimsmeistarakeppnir í póker, þar sem þeir langbestu spila, en einnig s.k. celebrity poker. Aðal ástæðan fyrir að þetta er orðið áhugavert sjónvarpsefni er myndavél sem er byggð í spilaborðið og sýnir áhorfandanum hönd spilaranna. Þannig fær áhorfandinn í raun að spreyta sig á ákvarðanaferli hvers spilara.

Ég spila þennan leik af og til við vini mína. Við spilum með litlar upphæðir þar sem hver borgar 5 dollara fyrir að fá að taka þátt. Það er ansi skemmtilegt því eins og með klettaklifrið er maður að miklu leyti að fást við sjálfan sig. Lykilatriðið er að vera með góða áætlun og halda sig við hana. Það getur verið frekar erfitt sálrænt þegar maður sér aðra spila með annarri aðferð og ganga vel. Þá reynir á sjálfsagann og sannfæringuna um eigið ágæti.

I klifurferd

2006-09-17T09:57:00.000-05:00

Vid Tinna og Raggi erum i Kentucky i klifurferd. Gist a tjaldstaedi vid Miguel's thar sem bara er klifurfolk. Sidan eru her klifurbrautir ut um allt. Keypti serstaka bok um svaedid med lista yfir brautir og hun er um 300 bls.

Vid hofum verid i thessu sporti nuna i meira en tvo ar en klifrum varla nema langaudveldustu brautirnar -- haest 5.9. Til gloggvunar eru byrjendabrautir 5.6 og 5.7 --- margir geta klifrad 5.6 i fyrstu ferd. 5.8 gradan thykir einnig audveld.

Thad sem er gott vid klifrid er ad madur er ad fast vid sjalfan sig -- thad skiptir litlu mali thott adrir a svaedinu seu klifurhetjur sem fulsa vid brautunum okkar, thvi madur finnur ad thetta tekur a og madur er a ystu nof.

Heimsókn, rannsóknir og tölvuleikir

2006-09-05T16:51:00.000-05:00

Helsta úr mínu lífi sem stendur

Raggi vinur minn kemur í kvöld í heimsókn. Hann verður í tvær vikur. Leifur ætlaði líka að koma en afboðaði því miður á síðustu stundu vegna anna. Ég ætla að draga Ragga í hjólatúr á morgun.

Rannsóknunum mínum fleygir áfram. Ég fékk hugmynd rétt áður en við fórum í kanóferð og byrjaði að skrifa forrit í bílnum á leiðinni norður. Núna er forritið keyrsluhæft og lofar góðu.

Málið er að tölfræðilega aðferðin sem ég hef verið að vinna við krefst þungra reikninga. Svo þungra að hugsanlegt er að ekki sé hægt að nota aðferðina á raunveruleg gögn. Nýja hugmyndin flýtir mjög fyrir þessum útreikningum í mikilvægu tilfelli.

Svo bregðast New York Times sem önnur Times

NYTimes er með grein um tölvuleikinn World of Warcraft í dag. Út af fyrir sig ágætis grein fyrir þá sem hafa enga hugmynd um leikinn en gagnslaus fyrir okkur hin. Fyndnast var þó að önnur af tveimur myndum í greininni var ekki af WoW heldur af öðrum leik frá sama fyrirtæki, Starcraft.

Það er ágætt að sjá blaðið skrifa um tölvuleiki af og til en þeir mættu gera meira af því. Þetta er mikilvægur og gríðarlega vinsæll miðill sem verðskuldar sömu athygli og annað afþreyingarefni.

Kanóferð

2006-08-24T01:25:00.000-05:00

Í þessum skrifuðu orðum erum við Tinna að pakka fyrir kanóferðina miklu. Farið verður af stað á morgun til Minneapolis og tjaldað annað kvöld á mörkum Boundary Waters Canoe Area Wilderness. Á laugardaginn hefst svo kanóferðin sjálf. Við munum gista í fimm nætur á svæðinu, það þýðir að við verðum í sex daga á kanó.

Á svæðinu eru mörg lítil vötn. Maður ferðast um þau á kanó og ferjar síðan kanóið og farangurinn yfir á næsta vatn. Leiðin liggur frá Kawishiwi Lake til Sawbill Lake. Í fyrra fórum við í mun styttri kanóferð frá Sawbill Lake. Þá fórum við út á næsta vatn við hliðina, Lake Alton, og tjölduðum þar í tvær nætur. Komum síðan til baka. Ferðin í ár verður því mun lengri.

Við erum bæði þvílíkt spennt fyrir þessari ferð. Ekki skemmir fyrir að við munum fá hingað góða gesti að ferðinni lokinni, þá Ragga og Leif.

Economist misnotar tölulegar upplýsingar ?

2006-08-20T11:36:00.000-05:00

Ég er mjög hrifinn af tímaritinu Economist. Þar fæ ég bæði fréttir af nýjungum í fjármálaheiminum en líka alveg frábæra umfjöllun um pólitískt ástand víðsvegar um heim.

Í nýjasta tölublaðinu er grein um tryggingaiðnaðinn í Bandaríkjunum. Þar notar höfundur töflu
yfir heildariðgjaldagreiðslur landa sem hlutfall af vergri landsframleiðslu til að færa rök fyrir því að iðgjöld séu lægri í Bandaríkjunum en mörgum öðrum löndum. Þannig er hlutaflið um 8.5% í BNA en um 12.2% í Bretlandi.

Ég er ekki sannfærður við að sjá þessar tölur. Heildariðgjöld fara nefnilega bæði eftir upphæð iðgjaldanna en líka eftir því hversu mikið er keypt af tryggingum. Þannig var þetta hlutfall t.d. nálægt 3% á Íslandi skv. upplýsingum frá Norsku hagstofunni. Ástæða þess er sennilega ekki sú að tryggingar eru svona ódýrar á Íslandi. Bandaríkjamenn verða nefnilega að kaupa sér heilsutryggingu sem við Íslendingar sleppum við.

Ég er ekki hagfræðingur og langt frá því að vera sérfræðingur um tryggingamál. Þó þykir mér þessi meðferð tölulegra upplýsinga ekki nógu góð. Economist er venjulega með mjög pottþéttar og sannfærandi greinar. Það er vonandi ekki að breytast.

Plan of Attack

2006-08-19T14:16:00.000-05:00

Bókin sem ég er að lesa þessa dagana heitir 'Plan of Attack´
og er eftir Bob Woodward. Hann er blaðamaður hjá
Washington Post sem er gríðarlega virtur innan bransans,
ekki síst fyrir að vera með bestu samböndin í hvíta
húsinu. Hann á það til að skrifa ekki fréttir um
safaríkustu upplýsingarnar heldur setja þær í bækurnar
sínar.

Plan of Attack kom út 2004. Hún fjallar um aðdraganda
stríðsins í Írak innan Bandarísku ríkisstjórnarinnar.
Woodward tók viðtöl við helstu forsprakka á borð við
Rice, Cheney, Powell, Rumsfeld, Card og líka Bush
sjálfan. Það er með ólíkindum hversu mikið honum
hefur verið trúað fyrir.

Meðal efnis eru leynileg viðtöl Bush bæði við
ráðgjafa sína og einnig við erindreka erlendra
ríkisstjórna, t.a.m. Bretlands og Saudi Arabíu. Einnig
er fjallað um sambönd innan hvíta hússins. Þannig
var samkvæmt bókinni Powell innanríkisráðherra mjög
í nöp við Cheney og Rumsfeld.

Frásögnin er í tímaröð og greinir frá samskiptum og
helstu atburðum. Rithöfundurinn forðast að túlka eða
koma eigin skoðunum á framfæri. Þrátt fyrir það er
greinilegt af aflestri bókarinnar að Bush og ráðgjafar
hans voru farnir að hallast að því að ráðast á Írak
jafnvel fyrir 11. september 2001. Þeir höfðu litla
trú á að samningaleiðin myndi bera árangur. Meðan á
vopnaleit Hans Blix stóð voru þeir búnir að sannfærast
um að Blix væri ekki nógu ákveðinn í leitinni.

Í forsetakosningunum 2004 var bókin á leslista beggja
frambjóðanda, bæði Bush og Kerry. Ég get ekki annað
en mælt með henni sjálfur.

Vatnaskil

2006-08-18T14:37:00.000-05:00

Formaður Framsóknarflokksins er fylgjandi niðufellingu tolla á landbúnaðarvörur skv þessari frétt á mbl.is:

Halldór Ásgrímsson, formaður Framsóknarflokksins, segist telja augljóst, eftir að hafa lesið skýrslu um ástæðu fyrir háu matvælaverði hér á landi, að fella þurfi niður vörugjöld.
„Skattur á matvæli þarf að vera sá sami, þar á meðal á hótelum og veitingahúsum. Breyta þarf innflutningsverndinni þannig að samkeppni aukist. Hvað réttlætir t.d. að við borgum miklu hærra verð fyrir kjúklinga og svínakjöt en aðrir neytendur í Evrópu. Það er enginn eðlismunur á þessari framleiðslu og margvíslegri annarri framleiðslustarfsemi í landinu sem býr við óhefta samkeppni við önnur lönd,” sagði Halldór í ræðu sinni á flokksþingi Framsóknarflokksins, sem hófst nú síðdegis en á morgun verður kjörinn nýr formaður flokksins.

Háir innflutningstollar á matvælum og niðurgreiðslur til bænda eru efnahagslegt vandamál í öllum vestrænum löndum. Tollarnir hafa í för með sér óhagkvæmni í framleiðslu auk þess sem þróunarlöndin eru kúguð með því að halda þeim frá markaðnum. Niðurfelling á tollum mun leiða til lægra vöruverðs til neytenda og um leið hjálpa þróunarlöndum mikið með því að opna fyrir þeim markaði.

Á Íslandi er vandinn sérlega hvimleiður þar sem landbúnaður borgar sig svo lítið. Til að sporna við þessu eru millifærslurnar og tollarnir mjög háir, sem kemur aðallega niður á neytendum. Það kemur líka niður á bændum þar sem niðurgreiðslurnar festa þá í niðurlægjandi atvinnugrein þar sem lífsviðurværi harðvinnandi manna er komið undir sporslum frá almenningi.

Eins og lesendur gera sér sennilega grein fyrir er ég mjög ánægður með þessi straumhvörf í Framsóknarflokknum. Jafnframt kemur mér þetta gríðarlega á óvart. Næstu skref í þessa átt væru að hætta niðurgreiðslum og svo að lokum að leggja niður Framsóknarflokkinn.